Qum kəndi Qax rayon mərkəzindən 8 km aralıda Baş Qafqaz Silsiləsinin ətəyində, dəniz səviyyəsindən 700m yüksəklikdə yerləşir.

Qum kəndində çox da böyük olmayan dağ çayı – Ərdəva çayı axır. Dağ ətəkləri sıx meşələrlə əhatə olunub. Meşələr əsasən yabanı meyvə ağaclarından, əzgil, alça, zoğal, meşə alması, meşə armudu ağaclarından ibarətdir.

Kənd 200 evdən ibarət olmaqla əhalisinin sayı 2000 nəfərə çatır. Kənddə Qafqaz Albaniyası dövrünə aid tarixi abidələr və məscid var. Alban abidələrindən V əsrə aid bazilika diqqətəlayiqdir Qum kəndi yaxınlığında bazilikanın dağılmış vəziyyətdə qalıqları mövcuddur. Bu abidə ağaclıq və kolluqlar içində qalıb. V əsrə aid Qum bazilikasında restavrasiya işləri başlanıb. Abidə çox möhtəşəmdir. İri daş sütunları və tağları çox incəliklə işlənmişdir.

Kəndin kənarında çox da böyük olmayan digər alban məbədi vardır. Abidə qədim məhəllə kilsəsi kimi fəaliyyət göstərmişdir. Kənddə XlX əsrə aid sünnü məscidi fəaliyyət göstərir. Burada həftədə bir dəfə yerli molla azərbaycan dilində xütbə aparır. Kənd əhalisi qonaqpərvərdirlər.

Şəxsi həyətlərdə meyvə ağacları və bostanlar vardır. Həyətlərdə üzümçülük də geniş yayılmışdır. Burada “izabella” və “amerikan” üzüm növlərindən ev şəraitində çaxır hazırlanır.

Əhali milli toy və dəfn mərasimlərini qoruyub saxlayıblar. Məişət həyatında da bir çox xüsusiyyətlər qorunmaqdadır. Hətta köhnə mətbəx ənənələri yaşamaqdadır. Gündəlik həyatda əsasən süd məhsulları, bal, meyvə, ət məhsulları və un məmulatlarından istifadə olunur.

Qum kəndindən 5 km aralı Çinarlı kəndi ərazisində Qaraçayın ətrafında “Ballı bulaq” ərazisi gözəl mənzərəli və istirahət mərkəzidir. Bura Azərbaycanın müxtəlif rayonlarından istirahətə gəlirlər.

Qum bazilikası V əsr

Meyvə bağçası

Bazilikanın iç görünüşü

Ləkit məbədi

HARADA QALMAQ OLAR

Kənddə mehmanxana və qonaq evi yoxdur. Turistlər kənd evlərində qala bilərlər. Evlər dağlıq ərazi üçün səciyyəvi olan çay daşından və çiy kərpicdən tikilir. Turistlər ev sahiblərinin hazırladığı məhsullarla qidalana bilərlər. Evlər əsasən birmərtəbəli və eyvanlı olur. Döşəmələr taxta və üzəri palasla örtülü olur. Evlər rahat və təmizdir. Ev sakinləri bulaq suyundan istifadə edir. Tualet əsasən həyətdə olur. Tualetlər aziat tiplidir. Kəndin mərkəzində ərzaq dükanı var. Hər ailə iki otaqda yerləşdirməklə, 4-6 turist qəbul edə bilər.

Səhər yeməyinə bal və süd məhsullarından – pendir, kəsmik, şor, nehrə yağı; nahara – küftə bozbaş, üzüm yarpağından dolma, buğlama; şam yeməyinə - lobyadan hazırlanmış xörəklər, kükü (yumurta və göyərtidən hazırlanır) və digər xörəklərdən dadmaq olar.

Ev I
Ev sahibi:
Əlicanova Zümrüd
- bir mərtəbəli ev;
- şəxsi həyət
- kirayə verilən otaqlar– 2 - yataq otağı – 2
- vanna otağı var

- bir sutka qalmaq və səhər yeməyi (1 nəfər üçün) – 10$
- bir sutka qalmaq və 3 dəfə yemək (1 nəfər üçün) – 15$

Kənddə əlaqələndirici şəxs: Şirin Müslümov.

NECƏ GETMƏK OLAR

Qum kəndinə Qax rayon mərkəzindən reys avtobusla və ya avtovağzaldan taksi ilə getmək olar. Yol asfaltdır. Ərdava-çay üzərində körpüyə qədər olan 1km-lik yolda təmir işləri gedir.

XRONOMETRAJ

Marşrut: Qax şəhəri – Qum kəndi
Məsafə 8 km, yol vaxtı – 12 dəq
Bakı şəhərindən Qax şəhərinə qədər məsafə - 385 km, 6 saat

QUM KƏNDİNƏ İKİ GÜNLÜK TURUN PROQRAMI 

l Gün

- Günün birinci yarısı: Bakıdan çıxış; Qaxa gəliş; yol boyu təbii mənzərələrin seyri və qəlyanaltı;
- Günün ikinci yarısı: Qum kəndinə gəliş və kənd evlərində yerləşmə; Yerli mətbəxdən ibarət nahar yeməyi; Kənd ətrafına ekskursiya, kəndin məişət həyatı və etnoqrafiyası ilə tanışlıq; Kənddə olan alban abidələrinə baxış (V əsr); Yerli mətbəxdən ibarət şam yeməyi.

ll Gün

- Günün birinci yarısı: Səhər yeməyi; İlisu dövlət qoruğuna aid olan Qum meşəsinə gəzinti, Çinarlı kəndində “Ballı bulaq” adlanan yerə gəzinti və Söhüb qalasına ekskursiya.
- Günün ikinci yarısı: Qaraçayın kənarında Ballı bulaq adlı yerdə nahar yeməyi; Kənddən çıxış və Bakıya qayıdış.